Sanaag(AllPuntland)- Wasiirka warfaafinta dawlad goboleedka Puntland C/raxmaan Maxamed Bankax ayaa sheegay in ciidamo ka socda maamulka la baxay Somaliland ay soo weerareen deegaanno dhowr ah oo ka tirsan Puntland sida Dhahar , Xuddun iyo Awrboogays.

Wasiirku wuxuu AllPuntland uga waramay in iska hor imaad uu marka hore ka dhacay magaalada Dhahar , kaasoo aan wax khasaare ah gaysan, dibna loo riixay ciidamadii duullaanka soo qaaday.

Md: Bankax wuxuu ka dhawaajiyay in si nabad galyo ah looga saaray ciidankii soo weeraray deegaannada kale ee Xuddun iyo Awrboogays oo ka tirsan gobolka Sool.

Wasiirku wuxuu sheegay in maamulka waqooyi galbeed uu doonayo inay carqaladeeyaan socdaal wafdi reer Puntland ah ay ku marayaan gobollada Sool iyo Sanaag.

Md: Bankax wuxuu sheegay in maamulka la baxay Somaliland uu weeraradan iyo waxa uu ku tilmaamay gardarada cad ee Puntland uu ku hayo uga danleeyahay inuu aqoonsi ku helo, asago ku tilmaamay mid ay ku fashilmeen .

Wasiirka warfaafintu wuxuu sheegay in dad deegaannada Sool iyo Sanaag kasoo jeeda ay hor kacayaan ciidamada duullaanka kasoo qaaday Somaliland,asagoo uga digay falalkaasi.

” Puntland mar walba waa difaac, ciddii kusoo gardarootana way iska difaaci doontaa” ayuu yiri Md: Bankax .

CCC Farayaamo
AllPuntland

Advertisements