Gole deegaan oo ay shacabku soo doorteen ayaa markii ugu horreysey laga dhisay degmada Xinglool ee Gobolka Sanaag, iyadoo ay degmada Xingalool ay ku soo biirtay magaalooyinka Puntland ee leh golayaasha deegaanka, ayna noqotay degmada 20-aad leh gole deegaan ee ay dadku soo doorteen katana tirsan dawlad goboleedka Puntland.

Tartanka duqa degmada Xingalool ayaa waxaa isu soo taagey Yuusuf Faarax Siciid iyo Maxamuud Cali Shire oo ku kala baxay doorasho gacan taag ah.

Xubnaha golaha deegaanka degmada Xingalool oo gaaraya 30 ayaa waxaa goob joog ka ahaa 28 xubnood, waxana duqa degamada Xingalool ku guuleystey Yuusuf Faarax Siciid iyadoo uu musharraxii la tartamayey uu ugu hambalyeeyey guusha isla markaasna uu aqbalay natiijada.

Natiijada doorashada ayaa waxaa ku dhawaaqay wasiirka dawladaha hoose iyo horumarinta reer miyiga ahna guddoomiyaha dhismayaasha golayaasha deegaanka degmooyinka Puntland, Cali Cabdi Awaare.

Sidoo kale, munaasabaddaasi ayaa waxaa khudbad ka jeediyey guddoomiyaha golaha wakiillada dawlad goboleedka Puntland, Axmed Cali Xaashi, iyadoo ay goob joog ka ahaayeen wasiirro ay kamid ahaayeen wasiirka hawlaha guud iyo gaadiidka iyo duuliska hawada, Eng Cabdullaahi Cail Xirsi.

Wafdiga sare ee ka socda dawlad goboleedka Puntland ayaa si diirran loogu soo dhoweeyey magaalada Xingalool, waxanay maamulka ka codsadeen in wax laga qabto arrimaha horumarinta bulshada.

Axmed Shaam

SBC Xingalool

Advertisements