Boosaaso(AllPuntland)- Maamul goboleedka Puntland ayaa caawa ka hadlay dagaallo galabta ka dhacay degmada Dhahar ee gobolka Sanaag , halkaasi oo ciidamo ka tirsan Somaliland ay kusoo duuleen fariisimada ciidanka daraawiishta Puntland.

Wasiirka dawladaha hoose iyo horumarinta reer miyiga Cali Cabdi Awaare ayaa sheegay in dagaalka guulo ay Puntland kasoo hoyisay.

Awaare oo caawa waraysi siinayay Radio Daljir ayaa sheegay in shan gaari oo kuwa dagaalka ah lagala wareegay maamulka la baxay Somaliland.

Wasiirka dawladaha hoose wuxuu sheegay in ciidamada maamulka la baxay Somaliland duullaankii ay galabta soo qaadeen in dib looga qabsaday deegaannadii ay labadii maalmood ee ugu danbeeyay joogeen.

Cali Cabdi Awaare wuxuu xusay in Puntland ay muujisay dhabar adayg iyo is difaac, asagoo xusay inuu rajaynayo in Puntland mar walba guulaysato maadaama aysan ayadu weerar ahayn oo ay dhulkeeda joogto.

Mar wax laga waydiiyay Cali Cabdi Awaare khasaaraha dagaalka wuxuu sheegay inuusan wax intaasi dhaafsiisan ka haynin labada dhinac.

Awaare wuxuu sheegay inay saxaafadda si dhaqso ah ugu soo gudbin doonaan wararkii ugu danbeeyay ee Dhahar.

Dagaalkan ayaa galabta bilowday ayadoo la sheegay in ciidamda maamulka la baxay oo maalmo ka hor haystay Dhahar ay isku dayeen inay maamulkooda sii fidiyaan.

CCC Farayaamo
AllPuntland

Advertisements