Last Updated::2007-04-15 13:42:46

Dhahar:- Degmada Dhahar ee gobalka Sanaag oo ay shalay dagaalo ku dhexmareen Ciidamada Daraawiishta iyo kuwa Maamulka Somaliland ayaa saaka degen.

Ciidamada Puntland ayaa saaka oo Axad ah gudaha u galay magaalada Dhahar isla markaana la wareegay nawaaxiga goobihii shalay ay dagaaladu ka dhaceen ee Bariga iyo Galbeedka magaalada Dhahar.

Waxaa soo baxaya warbixino horleh oo la xariira khasaarihii Dagaalkii shalay ayadoo la sheegay in sadex qof oo shacab ah ay dhaawacyo kasoo gaareen rasaastii ka dhacday duleedka magaalada.

Magaalada Dhahar ayaa ahayd shalay goob dagaal ayadoo Bariga iyo Galbeedka Dhahar ay food isku dareen ciidamo kakala socda Puntland iyo Soomaaliland.

Saaka oo Axad ayaa markale waxaa hawada dib ugu soo noqday Telefonkii degmada oo shalay la jaray xiligii ay dagaalada Socdeen.

Wararka aanu kasoo xiganeyno dadka deegaanka ku dhaqan ayaa sheegay in ay indhahooda ku arkeen in ka badan 12 meyd ah oo kamid ah askartii shalay ka dagaalamay degmada ee ka socday dhinaca Somaliland.

Askartaasi ayaa la sheegay in ay ku dhinteen dagaalkii ugu horeeyey ee shalay ka dhacay Dhahar kadib markii ay weerar kadis ah kusoo qaadeen ciidamada Puntland.

Degmada Dhahar ayey isaga baxeen koox wasiiro ah oo ka socday Somaliland oo ayagu degmada tagay taasina ay keentay dagaalka hada dhacay.

Dhinaca Puntland ayaa la xaqiijiyey in ay ka dhinteen labo askari ayadoo ay ku dhaawacmeen sadex kale.

Ciidamada Puntland oo xalay seexday hareeraha degmada Dhahar ayaa saaka arooryadii soo galay gudaha Degmada ayadoo ay la socdaan qaar kamid ah Maamulkii degmada Dhahar oo uu ugu horeeyo guddoomiyihii degmada Saladad Xasan Shire.

Xassan Ciise

Advertisements