Xildhibaanad Caasho Axmed Cabdalla oo ka mid ah xildhibaanada baarlamanka federaalka Soomaaliya ee ka soo jeeda gobolada Sool iyo Sanaag bari ayaa markii ugu horeeyey ka hadashay dagaaladii maalmihii la soo dhaafay ku dhexmaray deegaanka Dahar ee gobolka Sanaag ciidamada labada maamul ee Somaliland iyo Puntland, kuwaasoo ay ku tilmaantay iney yihiin dagaalo lagu dhibaateynayo dadka halkaas ku dhaqan oo ay sheegtay iney yihiin kuwo nabada jecel.

Xildhibaanada ayaa ku eedeeyeysay labada maamul iney hardamayaan dadka dushiisa waxayna ugu baaqday iney si deg deg ah colaada u soo afjaraan oo haddii ay sidaa yeeli waayaaana ay qaadi doonaan mas’uuliyadda wixii khasaare ah ee ka yimaada dagaalada ay wadaan sida ay sheegtay “kuwa Puntland u shaqeeyana dano gaar ah ayey wataan, kuwa kale ee Somaliland la shaqeeya iyana dano gaar ah ayey leeyihiin ma jirto labada dhinacba cid u daneyneysa shacabka halkaas ku nool, waxaan ugu baaqayaa labada dagaal ooge ee Rayaale iyo cadde iney faraha kala baxaan arimaha gobolada Sool iyo Sanaag haddii ay sidaa yeeli waayaana dacwad ayaan ka gudbinaynaa aanu geyneyno maxkamada dembiyada dagaalka” ayey tiri xildhbaanad Caasho Axmed Cabdalla.

“Ma soconeyso isku qabiil ayaanu nahay oo anagey na raacayaan iyo isticmaarkii ayaa xadeeyey oo anagey na soo raacayaan, qabiil haddii wax lagu faa’iidayo Soomaalida ayuu wax u tari lahaa oo maanta kuwii isla dhashay ayaaba is dilaya, isticmaar mar hore tegay xuduudo uu dhigay inaan weligeen ku kala oodnaanana waa nasiib daro dad aaminsan haddii ay jiraan, dadkan reer Sool iyo Sanaag, bari galbeed midna lagama xukumi jirin waxay ahaayeen boqortooyo iyada ismaamusha” ayey sidoo kale tiri xildhibaanad Caasho Axmed Cabdalla oo ugu baaqday dadka ku nool Sool iyo Sanaag iney aayahooda ka tashadaan oo aaney noqon dad ay kala jiitaan wax ay ku tilmaamntay maamulada danaha gaarka ah kala wata.

Xafiiska Muqdisho, Somalia
dayniilecom@hotmail.com

Advertisements